स्वातंत्र्यदिनाचे औचित्य साधून उपमुख्यमंत्री अजित पवार यांच्या हस्ते राष्ट्रध्वज स्तंभाचे लोकार्पण
मुख्य संपादक : संतोष पांढरे (बारामती)
बारामती शहराचा ऐतिहासिक व सांस्कृतिक वारसा आज एका नव्या पर्वाचा साक्षीदार ठरला. स्वातंत्र्यदिनानिमित्त बारामतीच्या मध्यवर्ती ठिकाणी तब्बल ३० मीटर उंचीचा राष्ट्रध्वज स्तंभ उभारण्यात आला असून, त्याचे लोकार्पण उपमुख्यमंत्री अजित पवार यांच्या हस्ते करण्यात आले. नटराज नाट्य कला मंडळाने सामाजिक उत्तरदायित्व निधीतून उभारलेला हा ध्वजस्तंभ शहराच्या अभिमानाचे नवे प्रतीक ठरला आहे.१५ ऑगस्ट रोजी सकाळच्या सत्रात पार पडलेल्या या सोहळ्याला बारामतीकरांचा प्रचंड उत्साह लाभला. परिसर तिरंग्याच्या रंगांनी सजविण्यात आला होता. विविध शाळा, महाविद्यालये, स्वयंसेवी संस्था आणि स्थानिक नागरिक मोठ्या संख्येने उपस्थित होते. राष्ट्रगीताच्या सुरात आणि भारत माता की जय घोषणांनी वातावरण दुमदुमले.
उपमुख्यमंत्री अजित पवार यांनी आपल्या भाषणात बारामतीच्या स्वातंत्र्यलढ्यातील योगदानाचा उल्लेख करताना सांगितले, “हा तिरंगा केवळ कापडाचा तुकडा नाही; तो आपल्या त्याग, पराक्रम व एकतेचे प्रतीक आहे. तरुणाईने या ध्वजाकडे पाहून राष्ट्रभक्तीची प्रेरणा घ्यावी.” यावेळी अजित पवार यांनी शहरातील विविध विकास प्रकल्पांची माहितीही दिली. ट्रॅफिक नियंत्रण, सीसीटीव्ही कॅमेरे, स्वच्छता उपक्रम, अतिकाय जाहिरातींवर निर्बंध या योजनांवर भर देत नागरिकांना प्रशासनाला सहकार्य करण्याचे आवाहन केले.
या ध्वजस्तंभामुळे परिसराला नवे स्वरूप मिळाले असून तीन हत्ती चौकाला ‘तिरंगा सर्कल’ असे नामकरण करण्यात आले. याच कार्यक्रमात उत्कृष्ट कामगिरी करणाऱ्या पोलिस अधिकाऱ्यांना विशेष सेवा पदकाने गौरविण्यात आले.ध्वजारोहणानंतर ‘मेरा भारत महान’ या देशभक्तीपर सांस्कृतिक कार्यक्रमाने उपस्थितांची मने जिंकली. शालेय विद्यार्थ्यांनी सादर केलेल्या नृत्य, गीत व नाट्यप्रयोगांना प्रेक्षकांनी भरभरून दाद दिली.या भव्य ध्वजामुळे बारामती शहराचा नवा ओळखबिंदू निर्माण झाला आहे. दिवसा चमकणारा आणि रात्री प्रकाशझोतात न्हाऊन निघणारा हा तिरंगा शहरात येणाऱ्या प्रत्येकासाठी आकर्षण ठरत आहे. बारामतीकरांसाठी हा केवळ ध्वज नाही तर अभिमान, प्रेरणा आणि राष्ट्रीय एकतेचे जिवंत प्रतीक आहे.
