मोडनिंब शहर सराफ व सुवर्णकार असोसिएशन,व्यापारी वर्ग आणि स्थानिक नागरिकातर्फे भव्य सत्कार समारंभ
मुख्य संपादक : संतोष पांढरे ( मोडनिंब )
गावातील मेहनत, चिकाटी आणि प्रगतीचे उदाहरण म्हणून ओळखल्या जाणाऱ्या सौ. वृषाली विशाल मेहता यांची राज्य कर अधिकारी (STO) म्हणून बदली होऊन सोलापूर GST कार्यालयात नियुक्ती झाल्याची बातमी समोर येताच मोडनिंब शहरात आनंदाचे वातावरण पसरले. यानिमित्ताने मोडनिंब शहर सराफ व सुवर्णकार असोसिएशनतर्फे बुधवार, १७ सप्टेंबर २०२५ रोजी विशाल मेहता यांच्या बंगल्यावर भव्य सत्कार समारंभ आयोजित केला होता.स्थानिक सराफ व सुवर्णकार बांधवांनी तसेच गावातील नागरिकांनी वृषाली मेहता यांच्या यशाबद्दल अभिमान व्यक्त केला. सराफ असोसिएशनच्या पदाधिकाऱ्यांनी सांगितले की, “सौ. वृषाली मेहता या मोडनिंब गावातील मुलींसाठी तसेच तरुण पिढीसाठी प्रेरणादायी व्यक्तिमत्व आहेत. त्यांनी आपल्या कार्यनिष्ठा आणि समर्पणाच्या जोरावर राज्य कर विभागात महत्वाचे स्थान मिळवले आहे. त्यांचा हा प्रवास गावातील सर्वांसाठी उर्जास्रोत आहे.”
सत्कार समारंभासाठी गावातील मान्यवर, व्यापारी वर्ग, नातेवाईक, महिला मंडळ तसेच विविध सामाजिक संस्थांचे पदाधिकारी मोठ्या संख्येने उपस्थित होते.कार्यक्रमाचे सूत्रसंचालन स्थानिक युवकांकडून केले गेले. सुरुवातीला सराफ असोसिएशनतर्फे वृषाली मेहता यांचे पुष्पहार, शाल-श्रीफळ देऊन अभिनंदन केले.
सोलापूरसारख्या महत्त्वाच्या शहरात GST कार्यालयात जबाबदारीची भूमिका सांभाळणे हे केवळ वैयक्तिक यश नसून मोडनिंबसाठी अभिमानास्पद आहे. मेहता परिवाराची सामाजिक बांधिलकी व गावाशी असलेली नाळ घट्ट असल्यामुळे गावकऱ्यांमध्ये आनंद व अभिमानाची भावना व्यक्त होत आहे.विशाल मेहता व कुटुंबीयांनी सांगितले की, “गावातील लोकांनी दाखविलेल्या विश्वास आणि प्रेमामुळे हे यश शक्य झाले. वृषाली यांच्या प्रगतीत गावकऱ्यांचा आशीर्वाद मोलाचा आहे. ही सन्मानाची संधी आम्हाला केवळ कुटुंबासाठीच नाही तर संपूर्ण मोडनिंबसाठी आहे.”यावेळी असोसिएशनतर्फे विविध मान्यवरांची भाषणे झाली.गावातील तरुणांना करिअर घडवण्यासाठी मेहनत, प्रामाणिकपणा आणि शिक्षण यांचे महत्त्व पटवून दिले गेले.
कार्यक्रमानंतर सर्व उपस्थितांसाठी अल्पोपहाराचे आयोजन करण्यात आले होते.या सत्कारामुळे मोडनिंब गावाचे नाव राज्यभर झळकले असून, तरुणाईसाठी हे प्रेरणादायी उदाहरण ठरेल, असा सूर उपस्थितांकडून उमटत आहे. वृषाली मेहता यांच्या पुढील कार्यकाळासाठी गावकऱ्यांनी हार्दिक शुभेच्छा दिल्या आहेत.
