क्षपकराज सुवर्णा किरण शहा यांच्या स्मरणार्थ राहुल शहा परिवारातर्फे आयोजन - श्रद्धा, संस्कार आणि भक्तीचा अदभूत मिलाफ
📍 मुख्य संपादक : संतोष पांढरे ( मोडनिंब )
मोडनिंब या पवित्र भूमीवर गेल्या आठ दिवसांपासून श्रद्धा, भक्ती आणि संस्कारांचा अखंड प्रवाह वाहत होता. क्षपकराज सुवर्णा किरण शहा यांच्या पावन स्मृतीप्रित्यर्थ धर्मानुरागी श्री राहुल किरण शहा व परिवार यांच्या पुढाकारातून सिद्धचक्र महामंडल विधान हा अत्यंत भक्तिमय सोहळा मोडनिंब येथे २९ ऑक्टोबर ते ५ नोव्हेंबर २०२५ दरम्यान मोठ्या श्रद्धेने पार पडला.या धार्मिक सोहळ्यात सकल जैन समाजाचा उत्स्फूर्त सहभाग लाभला. गावातील मंदिरे, रस्ते, घराघरांतून शांतिमंत्रांचे स्वर गुंजत राहिले आणि संपूर्ण मोडनिंब भक्तीच्या रंगात न्हाऊन निघाले.
सोहळ्याची सुरुवात २९ ऑक्टोबर रोजी सकाळी ध्वजारोहणाने झाली. ध्वजारोहणाचे सौभाग्य श्री राहुल गांधी परिवार, श्री सुकुमार शहा परिवार आणि श्री सुजित कोठारी (दौंड) यांच्या हस्ते लाभले. विधान मंडपाचे उद्घाटन श्री सतिश हुकुमचंद शहा व परिवार यांच्या हस्ते झाले.
या सोहळ्याच्या सांस्कृतिक कार्यक्रमात सादर झालेली ‘मैना सुंदरी’ ही जीवनप्रसंगावर आधारित नाटिका सर्वांच्या मनाला भिडली. स्थानिक कलाकारांनी सादर केलेल्या या नाटिकेने भक्तांमध्ये एक नवीन प्रेरणा निर्माण केली. जैन तत्त्वज्ञानातील त्याग, साधना आणि संयम यांचा संदेश या नाटिकेतून प्रभावीपणे पोहोचला.
संपूर्ण विधान सोहळ्याचे मार्गदर्शन संभाजीनगर येथील बा. ब्र. विकास भैय्या यांनी केले, तर धार्मिक विधींचे संचालन स्थानिक पंडित प्रितम शहा यांनी केले. त्यांचे शांत, संयमी आणि विद्वत्तापूर्ण मार्गदर्शन हा या कार्यक्रमाचा आत्मा ठरला.
मोडनिंबच्या या भक्तीमय अध्यायाने एक गोष्ट पुन्हा अधोरेखित केली-“जिथे श्रद्धा, सेवा आणि एकता असते, तिथेच परमात्म्याची खरी उपस्थिती असते.”
